Umfjöllun: Ólsarar stálheppnir gegn liði úr 4. deild

Pepsi deildarlið Víkings frá Ólafsvík mætti í kvöld á Bessastaðavöll þar sem þeir mættu heimamönnum frá Álftanesi. Fyrirfram hefði mátt búast við þægilegum sigri gestanna enda 4 deildum ofar heldur en lið Álftaness.

Ólsarar byrjuðu leikinn af krafti og ætluðu strax að setja mark á heimamenn og beittu mikið af háum sendingum upp kanntana báðum megin en heimamenn vörðust af miklum krafti. Álftnesingar voru ekki að gefa nein færi á sér og kom sannarlega á óvart að Pepsi deildarlið skuli hafa verið að beita háum sendingum í stað þess að spila boltanum.

Heimamenn hefði hinsvegar getað komist yfir þegar sóknarmaður þeirra Andri Janusson slapp einn í gegnum vörn Ólsara en Einar Hjörleifsson bjargaði með frábæru úthlaupi og varði skot hans.

Fyrsta markið í leiknum kom á 20´mínútu þegar gestirnir tóku hornspyrnu, lítil hætta virtist vera á slakri spyrnu en á furðulegan hátt mistókst varnarmanni Álftaness að hreina boltann frá og sendi boltann í eigið net.

Margir héldu að hér væri eftirleikurinn auðveldur en annað átti eftir að koma á daginn. Aðeins fjórum mínútum eftir mark gestanna fengu heimamenn vítaspyrnu sem virkaði í ódýrari kanntinum en þá var Magnús Ársælsson togaður niður í teignum. Það var svo Guðbjörn Alexander Sæmundsson sem skoraði af miklu öryggi framhjá vítabananum Einari í marki Ólsara.

Ólsarar ætluðu að keyra í sókn og komast aftur yfir en skyndisóknir heimamanna voru mjög hættulegar og á 43.mínútu slapp Magnús Ársælsson einn innfyrir vörn Ólsara en Mate Jujilo braut á honum og fékk að launum verðskuldað rautt spjald.

Síðari hálfleikurinn var svo einnig hin mesta skemmtun, Ólsarar ætluðu sér að stjórna leiknum og fækkuðu í vörninni en heimamenn komu á óvart og fóru að pressa á gestina og voru mun hættulegri í öllum sínum aðgerðum.

Smám saman færðist meiri ró yfir 10 ólsarar og fóru þeir að reyna spila boltanum betur sín á milli í stað þess að beita löngum sendingum upp kanntana sem hafði ekki skilað þeim miklu. Á 71.mínútu eftir gott spil náðu þeir svo að skora þegar Guðmundur Steinn Hafsteinsson var mættur í sníkjuna á fjærstöng eftir góða lága fyrirgjöf.

Heimamenn voru þó langt frá því að gefast upp og fækkuðu í vörn og hófu stórsókn. Álftnesingar voru tvisvar hársbreidd frá því að jafna metin, fyrst átti Andri Janusson fast skot af 20 metra færi sem small í slánni og niður en Einar hefði ekki átt möguleika að verja. Þá fékk Magnús Ársælsson sóknarmaður þeirra sannkallað dauðafæri þegar hann fékk sendingu inn í teiginn og lék á varnarmann Ólsara en skaut rétt framhjá úr sannkölluðu dauðafæri.

Síðustu fimm mínúturnar virtist sem allur máttur hafi verið farinn úr heimamönnum og Ólsarar náðu að sigla sigrinum í hús. Ólsarar verða þó að teljast stálheppnir að ekki fór verr og heimamenn eiga hrós skilið fyrir mikla baráttu gegn Pepsi deildarliðinu.