SKÝRSLAN: Sterkt hjá KA en slæm ára yfir Val
Hvað réði úrslitum?
Færanýtingin, Valur fékk góð tækifæri til að komast yfir í leiknum en náði ekki að nýta þau. KA fékk sömuleiðis fleiri færi en það sem liðið svo nýtti en það dugði að nýta eitt.
Bestu leikmenn
1. Jakob Snær Árnason
Enn eitt mikilvæga markið hjá Jakobi í sumar. Stigið upp að undanförnu, duglegur allan leikinn og skoraði eina markið.
2. Bjarni Aðalsteinsson
Bjarni átti virkilega góðan leik í dag, steig inn í fjarveru Rodri og Andra Fannars. Varði vörn liðsins vel og það er mikil orka í honum. Jajalo fær einnig 'honorable mention' í þessu boxi.
Atvikið
Sigurmark KA. Eysteinn Hrafnkelsson (AD2) lyfti flagginu þegar Jakob skoraði en Pétur dómari sá atvikið úr annarri stöðu og sagði að um mark væri að ræða. Hann ræddi svo við Eystein og markið stóð. Hallgrímur Mar átti fyrirgjöf sem Sebastian Hedlund (varnarmaður Vals) skallar áfram og boltinn barst á Jakob Snæ sem setti boltann í markið.
Hvað þýða úrslitin?
Fimmti leikur Vals án taps og það er einhver slæm ára yfir liðinu. Gagnrýni leikmanns á undirbúning liðsins fyrir síðasta leik, Patrick missir hausinn undir lokin og spilamennskan í dag var alls ekkert frábær. KA er á sama tíma að gera flotta hluti eftir mótlæti, liðið hefur unnið tvo frábæra sigra í röð og eru nánast búnir að gulltryggja sér þriðja sætið. Svo er bara spurning hvort það dugi í Evrópusæti eða hvort KA nái að nýta sér þennan meðbyr og ná öðru sætinu.
Vondur dagur
Það eru margir hjá Val sem áttu engan sérstakan dag. Frederik Schram var flottur að venju en aðrir voru hreinlega ekki góðir. Hegðun Patricks er ekki boðleg, missir hausinn og fær rautt.
Dómarinn - 9
Við fyrstu sýn virtist Pétur meta öll vafaatvikin hárrétt, mesta spurningin kannski hvort Hallgrímur Mar hefði átt að fá víti í fyrra skiptið. Leikstjórnin einnig mjög fín.