SKÝRSLAN: Draumur um titilvörn úti
Hvað réði úrslitum?
Víkingar voru bara alltof máttlausir í dag. Í stað þess að nýta heppilega stöðu þegar liðið komst í 2-0 þrátt fyrir að eiga ekkert frábæran leik koðnaði liðið niður og bauð KR upp í dans. Það nýttu KRingar sér til hins ítrasta og brutu Víkingsliðið smám saman niður og uppskáru sanngjarnt jöfnunarmark í uppbótartíma.
Bestu leikmenn
1. Atli Sigurjónsson
Eins og svo oft áður er það Atli sem lætur hlutina ganga í sóknarleik KR. Baneitraðar fyrirgjafir sem særa lið eru eitt af hans sérsviðum.
2. Arnór Sveinn Aðalsteinsson
Fyrirliðinn poppaði upp á réttum stað á réttum tíma og tryggði sínum mönnum stig. Steig líka upp í seinni hálfleik þegar liðið var 2-0 undir og reif sína menn áfram.
Atvikið
Jöfnunarmarkið fær þetta, fagnaðarlætin úr Kópavogi nánast heyrðust yfir og stemmingin í Víkinni því sem næst dó.
Hvað þýða úrslitin?
Víkingar halda 2.sæti deildarinnar á markatölu en KA hugsar sér gott til glóðarinnar. KR situr í 5.sætinu.
Vondur dagur
Af mörgu að taka hér í dag hjá Víkingum en setjum þetta á Arnar Gunnlaugsson og þann hausverk sem hann hefur verið með á meðan á leik stóð. Liðið hans alls ekki að spila eins og þeir vilja og þess utan leikmenn í allskonar basli hér og þar á vellinum. Arnar mun hugsa mikið um þennan leik í kvöld.
Dómarinn - 6
Voru einhver stór atriði sem Helgi þurfti að taka á honum stóra sínum á? Nei allavega ekki sem einhver vafi lék á en Helgi var samt full grimmur á flautunni og virtist frá mér séð láta baul úr stúkunni til hans fara full mikið í taugarnar á sér.