Steindautt jafntefli hérna á Þórsvelli. Bæði lið geta verið sátt við stigið miðað við spilamennsku en það var íítið að frétta um færi og gæðin á síðasta þriðjungi ekkert sérstök. Held að það hefði ekki verið skorað þó leikurinn hefði staðið til 12 í kvöld. Viðtöl og skýrsla kemur seinna í dag. Takk fyrir mig!

Hallgrímur MAr vinnur aukaspyrnu á hættulegum stað. Held að þetta sé fjórða aukaspyrna KA á sama staðnum rétt fyrir utan teig.

Bjarki Björn gerir frábærlega vinstra megin á vellinum. Hann fór fram hjá Hrannari og nær mjög góðri fyrirgjöf sem Steinþór þarf að hafa sig allan við að blaka í burtu.

KA setja fína pressu á Eyjamenn hérna en ná ekki búa til neitt dauðafæri. Þeir enda með að vinna hornspyrnu sem Marcel grípur auðveldlega.

KA vinna hornspyrnu. Lítil hætta og boltinn endar á Marcel.

Hallgrímur Mar með spyrnuna enn og aftur og boltinn rétt svífur yfir markið.

Viðar fær langa sendingu fram. Hann tekur vel á móti boltanum en er tekinn niður rétt fyrir utan teig.

Viðar og Hallgrímur setja pressu á MArcel í marki Eyjamanna þannig að hann neyðist til að setja boltann í innkast.

Hallgrímur reynir fyrirgjöf en Marcel kemur út og er fyrstur á boltann.

Jóan Símun kemur með sendingu í gegn á Bjarna Aðalsteins en Bjarni nær ekki almennilega góðu skoti og boltinn fram hjá.

Hallgrímur tekur spyrnuna en hún fer af veggnum og aftur fyrir.

Felix með spyrnuna. Nokkuð góða spyrna en Steinþór nær að kýla boltann í burtu.

KA fá horn. Hallgrímur með spyrnuna á fjær beint á Ásgeir sem ætlar að skalla fyrir markið en Marcel er fyrstur á boltann.

Þetta er farið í gang. Vonandi fáum við að sjá eitthvað af mörkum í seinni hálfleik.

Markalaust í hálfleik. Leikurinn hefur einkennst af baráttu, aukaspyrnum og hálffærum. Bæði lið hafa átt ágætis upphlaup en ekki náð að skapa sér nein dauðafæri þannig þetta er bara sanngjöfn staða í hálfleik.

Sigurður Arnar með sendingu yfir völlinn á Felix. Hann kemur með fyrirgjöfina frá vinstri en Steinþór er vel vakandi og er fyrstur á boltann.

Uppbótartíminn 3 mínútur.

KA fá aukaspyrnu á hættulegum stað. Hallgrímur setur boltann í vegginn og Eyjamenn hreinsa.

Felix með langa sendingu fram ætlaða Sverri Pál en Steinþór er á undan í boltann.

Ásgeir Sigurgeirsson liggur eftir samstuð og Eyjamenn setja boltann út af.

Þorlákur Breki með sendingu inn fyrir á Bjarka Björn sem er allt í einu sloppinn einn gegn Steinþóri. Steinþór gerir virkilega vel í að loka á hann og boltinn yfir markið. Færið var þó nokkuð þröngt.

Ásgeir Sigurgeirs kemur með góða sendingu inn á teig Eyjamanna. Þar er Hallgrímur sem nær að taka boltann niður en Eyjamenn ná að blokka skotið.

Bjarki Björn með fyrirgjöf frá hægri en Steinþór kemur út úr markinu og handsamar boltann örugglega.

Hallgrímur Mar tekinn niður. Hallgrímur tók spyrnuna sjálfuna en hún er frekar laus og KA menn náðu ekki að skapa neina hættu.

Frábært spil hjá KA mönnum. Hallgrímur nær að koma með sendingu inn fyrir á Viðar Örn en hann nær ekki að fara framhjá Sigurði Arnari þannig hann reynir fyrirgjöf en þeir ná að hreinsa í horn.

Leikurinn einkennist af mikilli baráttu hérna fyrstu mínúturnar.

Felix Örn tekur skotið fyrir utan teig en það er rétt yfir.

Arnór Ingi er tekinn niður rétt innan við miðjulínuna.

Birgir Baldvins er við það að sleppa fram hjá Arnóri Inga en hann tekur hann niður og KA fær aukaspyrnu réttr fyrir utan teig.

Hermann með frábæra skiptingu yfir á Bjarka Björn. Hann er tekinn niður en ekkert dæmt. Sýndist þetta vera klár aukaspyrnu.

Oliver Heiðars hoppar hér á öðrum fæti útaf eftir samstuð. Hann virðist vera á leiðinni út af.

Bjarni Aðalsteins með frábærarn sprett framhjá nokkrum varnarmönnum Eyjamanna. Hann nær fyrirgöfinni en Sigurður Arnar nær að hreinsa í horn.

Bjarni Aðalsteins með fyrsta skot leiksins en það er hátt yfir.

Þetta er farið af stað í blíðunni á Þórsvelli og það eru KA menn sem eiga upphafsspyrnuna.

Varnarleikur KA í upphafi móts hefur ekki verið upp á marga fiska, Omar Sowe og Oliver Heiðarsson eru hættulegustu menn Eyjamanna fram á við og ógna þeir báðir sífellt með hraða sínum og krafti, Epic eru að bjóða upp á að Omar Sowe skori á stuðlinum 2,75 og Oliver á stuðlinum 3.

Helstu fréttur úr herbúðum Eyjamanna eru þær að Omar Sowe er ekki í leikmannahópnum. Hann haltraði af velli í 4-2 sigrinum á KR í Mjólkurbikarnum og greinilega ekki leikfær í dag. Marcel Zapytowski kemur aftur í markið og þá koma þeir Sverrir Páll Hjaltested og Arnór Ingi Kristinsson einnig inn í liðið. Hallgrímur Jónasson gerir fimm breytingar á liði KA. Birgir Baldvinsson, Hrannar Björn Steingrímsson, Jóan Símun Edmundsson, Ásgeir Sigurgeirsson og Marcel Römer koma inn í liðið en þeir Jakob Snær Árnason, Dagur Ingi Valsson og Guðjón Ernir Hrafnkelsson koma á bekkinn og þá eru þeir Hans Viktor Guðmundsson og Kári Gautason ekki með.

ÍBV vann KR í liðinni viku og kom sér þannig í 8-liða úrslit Mjólkurbikarsins. Liðið tekur á móti Val í næstu umferð bikarsins eftir mánuð. ÍBV situr í 8. sæti deildarinnar með sjö stig. Liðið hefur tapað tveimur deildarleikjum í röð; fyrst gegn Vestra á heimavelli og svo gegn KR á útivelli. KA er ríkjandi bikarmeistari en féll úr leik í bikarnum í vikunni eftir 2-4 tap á heimavelli gegn Fram. KA er þá í botnsæti deildarinnar með fjögur stig. Liðið hefur tapað tveimur deildarleikjum í röð, síðast gegn Breiðabliki á heimavelli síðasta sunnudag.

Honum til aðstoðar eru þeir Gylfi Már Sigurðsson og Antoníus Bjarki Halldórsson. Ólafur Ingi Guðmundsson er eftirlitsmaður KSÍ og Elías Ingi Árnason er fjórði dómari.

Eyþór Aron Wöhler, leikmaður Fylkis, er spámaður umferðarinnar. ÍBV 1 - 3 KA Ég mun ekki sitja fyrir framan sjónvarpið í þessum leik því miður. Ég spái því KA mönnum 3-1 sigri. Eyjan hefur ekki verið sú sama eftir að Jamaíkumaðurinn geðugi Richard King fór af Eyjunni, hans er sárt saknað. Eyjamenn hafa aðeins séð til sólarinnar núna nýverið en svo kemur norðlenska undrið Birgir Bald og drepur allar vonir Eyjamanna, hann hefur verið funheitur þessa dagana. Biggi setur tvö og Hrannar kemur í hefndarhug eftir að hafa verið settur á bekkinn og setur eitt mark.

Góðan daginn lesendur góðir og veriði velkomnir í beina textalýsingu frá leik ÍBV og KA í 7. umferð Bestu deildarinnar. Leikurinn fer fram á Þórsvelli í Vestmanneyjum.