Hver tekur við af Klopp? - Dani Olmo orðaður við Man Utd - Greenwood í skiptum fyrir Gleison Bremer
banner
   sun 01. júlí 2018 13:38
Elvar Geir Magnússon
Leikmaður á HM keyrði á gangandi vegfaranda sem lést
Amine Harit.
Amine Harit.
Mynd: Getty Images
Harit lék mjög vel á sínu fyrsta tímabili með Schalke í Þýskalandi.
Harit lék mjög vel á sínu fyrsta tímabili með Schalke í Þýskalandi.
Mynd: Getty Images
Amine Harit, sem lék með Marokkó á HM í Rússlandi, ók bíl á gangandi vegfaranda í heimalandi sínu með þeim afleiðingum að vegfarandinn, sem var 28 ára, lést.

Harit, sem er 21 árs leikmaður Schalke, var nýkominn heim frá HM en Marokkó komst ekki upp úr riðli sínum. Harit var valinn maður leiksins í 0-1 tapi gegn Íran í fyrstu umferð mótsins.

Atvikið átti sér stað eftir miðnætti á föstudagskvöld en samkvæmt lögregluskýrslum var vegfarandinn að fara yfir götuna í slæmu skyggni.

Fjórtán ára bróðir Harit var einnig í bílnum en einhverjir fjölmiðlar hafa haldið því fram að hann hafi í raun verið undir stýri. Samkvæmt lögregluskýrslu er það rangt.

Rannsókn stendur yfir. Harit hefur verið yfirheyrður af lögreglunni en fer í aðra skýrslutöku á morgun.

Sagt er að hann hafi í fyrstu ætlað að stinga af frá slysstað eftir atvikið en viðstaddir hafi hindrað hann í því.

Í tilkynningu frá Schalke segir að íþróttastjóri félagsins, Christian Heidel, hafi haft samband við Harit sem sé enn í miklu áfalli. Hann sé í faðmi fjölskyldunnar og í góðum höndum í Marokkó. Félagið sendir samúðarkveðjur til fjölskyldu og vina hins látna.

„Svona harmleikur skyggir á allt. Þetta er mjög sorglegt og mjög erfitt að finna orð," segir Heidel.

Harit lék sitt fyrsta tímabil með Schalke á síðasta tímabili eftir að hafa verið keyptur á 8 milljónir evra frá franska félaginu Nantes. Hann spilaði 29 leiki í þýsku Bundesligunni og fékk mikið lof fyrir sína frammistöðu.
Athugasemdir
banner
banner
banner