Álitsgjafar dæma treyjuna og merkið - Há meðaleinkunn!

Edda Sif Pálsdóttir, RÚV: 9
Búningurinn er mjög gæjalegur og merkið flott. Þetta er stílhreint og svolítið franskt vibe finnst mér. Heildarmyndin mjög góð og breytingin vel heppnuð. Ég tengi þetta ekki alveg strax beint við Ísland en það þarf ekkert að vera neikvætt og kemur pottþétt með tímanum.

Bjarni Þór Viðarsson, Síminn Sport: 9
Finnst þetta gríðarlega vel unnið merki, kominn tími á að við Ísland þróuðum okkur áfram eins og löndin sem við viljum bera okkur saman við. Búningurinn mun einnig gera mikið fyrir landsliðsfólkið okkar-það er ekki til betri tilfinning en að henda sér í fallegan íslenskan landsliðsbúning. Auðvitað mun maður samt sem áður alltaf sakna eldfjalla-jökla Reusch búningsins. Hrós á KSÍ og þá sem unnu að þessu - einkunn 9.

Haukur Harðarson, RÚV: 8
Mér finnst þetta heilt yfir mjög vel heppnað. Búningurinn er stílhreinn og merkið fellur áreynslulaust á hann. Skemmtilegast finnst mér að sjá hvað "konseptið" virðist úthugsað. Þar á ég við alla aukahlutina sem fara í framleiðslu samhliða öllu þessu og lúkkið í heild á landsliðunum. Vefverslunin með landsliðsvörur var líka eitthvað sem var löngu tímabært. Búningurinn fær 8/10. Mun klárlega næla mér í eintak.

Ragna Björg Einarsdóttir, leikmaður Augnabliks: 10
Mér líst vel á þetta - geggjaður búningur og merkið enn flottara ! Búningurinn fær toppeinkunn - Puma nelgdi þetta.

Ingólfur Sigurðsson, leikmaður KV og meðlimur Innkastsins: 10
Merkið er geggjað og treyjan sömuleiðis. Maður fékk síðan gæsahúð yfir kynningarmyndbandinu. Það er ljóst að það hefur farið alvöru vinna í þetta og vandað til verka. Get ekki beðið eftir að eignast treyju.

Orri Freyr Rúnarsson, Rás tvö: 9
Held að það hafi alveg verið kominn tími á nýtt landsliðsmerki og búning. Það var smá þreytt þegar að útlitið lak á netið í nokkrar mínútur á sínum tíma en það gleymdist um leið og kynningin frá KSÍ rúllaði af stað. Ef við byrjum á landsliðsmerkinu þá er ég gríðarlega sáttur við að tengja landvættina við alla hönnun og hugsun á bakvið merkið, svo er alveg hægt að gleyma sér í að lesa allar upplýsingar um ferlið inn á KSÍ vefnum. Líka alveg tímabært að aðskilja landsliðsmerkið og opinbert merki KSÍ. Annað sem skiptir máli er hvernig er hægt að troða þessu nýja útliti á allan varning, Ísland er orðið að stórþjóð í fótbolta og það á að nýta með að pranga allskyns vörum á aðdáendur út um allan heima, merkja rútur, bolta, nærföt og sokkabuxur með merkinu og þetta tikkar í öllu box þar.

Búningurinn sjálfur virkar einnig mjög vel á mig við fyrstu sýn. Er virkilega að meta þessa blöndu af nútíma- og nostalgíuútliti. Enginn ætti að skammast sín fyrir að klæðast þessari nýju treyju dagsdaglega um leið og hún kemur í búðir. Ég á svo alveg von á góðu gæsahúðarmyndbandi þegar að nýja treyjan verður formlega kynnt. Nenni ekki að fara út í það sem hefði mátt fara betur, en ætla að gefa þessu 9,0 í einkunn.

Magnús Már Einarsson, Fótbolti.net: 7,5
Ég gef búningnum 7,5 í einkunn. Finnst hann koma vel út. Hlakka til að sjá hann betur í leikjunum í haust. Sagan á bakvið merkið er skemmtileg og kynningin góð. Það er líka fagnaðarefni að KSÍ ætli að nýta merkið og selja alls konar varning og nota mismunandi útgáfur af merkinu í hornfána á Laugardalsvelli, vatnsbrúsa hjá liðinu og margt fleira. Þetta hefði reyndar mátt vera tilbúið þegar EM 2016 var en betra er seint en aldrei!

Benedikt Bóas Hinriksson, Fréttablaðið: 9 - 10
Héðan úr Mývatnssveit verð ég að viðurkenna að mér lýst vel á. Gallinn var að maður var auðvitað búinn að sja þetta allt saman enda lak allt út forðum daga. En þessi heimasíða með varningnum fær 10 af 10. Búningurinn fær sömu einkunn og eg gaf honum þegar þetta birtist i fyrsta skipti. Góða níu , Hlakka til að athuga hvort hann komist yfir covid bumbuna. Ef það gerist þá fær hann tíu!

Magnús Valur Böðvarsson, vallarstjóri á KR-velli: 7
Nýja landsliðsmerkið er geggjað, kominn tími til að við notum landvættina. Merkið minnir smá á hollenska merkið. Búningurinn virkar fínn, svona solid sjöa. Væri til að sjá restina til að sjá samsetninguna

Daníel Geir Moritz, eigandi ÍBV: 7,5
Mér finnst að ganga mætti lengra í túlkun á landvættum í logoinu en það er samt þokkalega vel heppnað. Búningurinn er fínn. Finnst vanta eitthvað rautt í hann þótt hann sé töff. Fær 7,5.

Daníel Rúnarsson, sérfræðingur: 8,5
Nýja merkið er virkilega gott með skemmtilegar vísanir í söguna. Loksins fáum við "skjaldarmerkið" okkar á treyjuna. Eitthvað sem segir mér að leikmenn landsliða Íslands muni fá meira út úr því að slá sér á brjóst en áður. Treyjan er síðan líka virkilega falleg. Einföld en samt lifandi. Mjög ólík síðustu treyjum og það er bara gott. Nýir tímar en samt smá tilvísun í gömlu klaka-treyjuna. Eitthvað sem segir mér að þessi treyja eigi eftir að líta ansi vel út á leikmönnum úti á velli. Ég er einn af þeim sem hef viljað sjá samstarf við alvöru stóran og alþjóðlegan íþróttavöruframleiðanda og mér sýnist á öllu að það hafi verið réttmæt krafa. Þetta er nokkrum skrefum fyrir ofan það sem Errea hefur getað boðið hingað til.

En stóru fréttirnar eru í raun ekki loka niðurstaðan, þ.e treyjan og merkið, heldur hvernig þetta var kynnt í dag. Allt sem fór úrskeiðis með nýja KSÍ merkið fyrr í vetur var leiðrétt og vel það. Búið var að æsa upp spenning í stuðningsfólki nokkra daga fram í tímann og svo þegar kom að frumsýningu þá gekk allt upp. Engir tæknifeilar. Fyrst kom frábært gæsahúðar myndband þar sem sagan á bakvið nýja landsliða-merkið er kynnt. Lái engum sem felldi smá tár þegar myndbrot af Sif Atla og svo Atla Eðvalds undir textanum "Hetjur koma og fara" leið yfir skjáinn. Síðan komu frábærar ljósmyndir sem kynntu nýja búninginn og loks small þetta saman á sér vefsíðu þar sem merki, treyja og allskonar annar varningur og notkun á nýja grafíska efninu var sýnd í verki. Allt frá litum, letri, áferð, hljóðheimi og jafnvel yfir í auka varningi eins og derhúfur, vatnsbrúsa og playstation fjarstýringar. Algjör negla.

Eina sem ég sakna er að geta ekki keypt neitt af þessu strax. Nýta meðbyrinn og selja þó ekki nema treyjurnar eða einfaldari bolina. Ég hefði dregið upp vísakortið.

Björn Már Ólafsson, sérfræðingur í ítölskum fótbolta: 8
Við fyrstu sýn líst mér vel á treyjuna. Kössótta klakamynstrið er passlega hógvært og kraginn finnst mér skemmtilegur. Merkið tekur sig vel út á búningnum og ég held að það muni njóta sín enn betur á hvítu landsliðstreyjunni.

Það er góð þumalfingurregla að dæma ekki landsliðstreyju fyrr en þú sérð vel þjálfaða landsliðsmenn- og konur fórna sér í tæklingar og spýta blóði í henni. Maður verður að sjá hana í action. Ég set smá spurningamerki við sniðið. Ermarnar eru frekar stórar og það á enn eftir að koma í ljós hvað gerist þegar leikmenn svitna og treyjan blotnar. En á þessum myndum sem birtar voru, hópmyndin, Instagram myndin frá Vestmannaeyjum og strákurinn sem snarar sér yfir auglýsingaskiltið, þá verður að segjast að hún treyjan stenst væntingar. 8/10 fær treyjan

Merkið finnst mér líka glæsilegt. Það vekur alltaf upp tilfinningar hjá stuðningsmönnum liða þegar tekið er upp nýtt merki eða þegar merki er breytt, en það var samdóma álit flestra stuðningsmanna að það var kominn tími á alvöru KSÍ merki og landvættirnir smellpassa í það hlutverk. Merkið þarf tíma til að venjast, en ég held að þegar fram líða stundir, þá verður þetta merki greipt inn í huga allra knattspyrnuáhugamanna á Íslandi.