Aganefnd KSÍ kom saman í dag eins og venjan er á þriðjudögum. Ljóst er hvaða leikmenn þurfa að taka út bann í þriðju umferð úrslitakeppni Bestu deildarinnar sem fram fer um næstu helgi.

Tarik Ibrahimagic skoraði tvö mörk fyrir Víking gegn Val en verður hinsvegar ekki með þegar Víkingar mæta Stjörnunni á sunnudag þar sem hann hefur safnað sjö spjöldum. Varnarmaðurinn Sigurður Gunnar Jónsson verður ekki með Stjörnunni í þeim leik þar sem hann er kominn með fjórar áminningar.

Tveir í banni hjá Val
Breiðablik fær Val í heimsókn en Valsmenn verða með tvo í banni vegna uppsafnaðra áminninga, það eru Lúkas Logi Heimisson og Orri Sigurður Ómarsson.

Grétar Snær Gunnarsson og Kristján Flóki Finnbogason verða í banni hjá FH þegar liðið mætir ÍA.

Í neðri hlutanum verður Ragnar Bragi Sveinsson fyrirliði Fylkis í banni þegar liðið heimsækir HK í gríðarlega mikilvægum fallbaráttuslag á sunnudag en Ragnar Bragi hefur safnað sjö gulum spjöldum. Atli Hrafn Andrason verður ekki með HK þar sem hann afplánar seinni leikinn í tveggja leikja banni sínu.

Finnur Tómas Pálmason verður í banni þegar KR heimsækir KA. Dagur Ingi Valsson verður ekki með Akureyrarliðinu eftir rautt spjald í síðasta leik.

   01.10.2024 12:27

Innkastið - Töfrar, tár og trúðaskór