Besti markvörður Seríu A er án landsliðs

Mile Svilar, markvörður Roma, hefur verið valinn besti markvörður ítölsku deildarinnar síðustu tvö tímabil.

Hann átti stóran þátt í að Roma endaði í þriðja sæti á síðustu leiktíð og tryggði sér sæti í Meistaradeildinni á ný. Hann hefur líka verið magnaður í upphafi þessa tímabils og Roma situr á toppnum.

Þrátt fyrir það spilar Svilar ekki með neinu landsliði. Hann er fæddur og uppalinn í Belgíu og lék með yngri landsliðum þjóðarinnar áður en hann ákvað að spila fyrir Serbíu, en þangað á hann ættir að rekja.

Faðir hans, Ratko, sem lék á sínum tíma með júgóslavneska landsliðinu, ráðlagði honum að velja Serbíu árið 2021. Svilar fór að ráðum hans og lék vináttulandsleik gegn Katar en sá eini leikur hefur haft mikil áhrif á landsliðsferil hans.

Svilar skipti síðar um skoðun og vildi aftur spila fyrir Belgíu. FIFA hafnaði því og í kjölfarið vildu Serbar ekki lengur velja hann í landsliðið.

Vandinn er sá að Svilar hafði þegar skipt frá Belgíu yfir til Serbíu. Þótt leikurinn gegn Katar hafi verið vináttulandsleikur kom þátttaka hans í honum í veg fyrir að hann gæti skipt til baka.

Þarna liggur munurinn á hans máli og máli Brahim Diaz, sem fékk að skipta frá Spáni yfir til Marokkó. Diaz hafði einnig spilað vináttulandsleik, gegn Litháen þar sem hann skoraði, en var að skipta um landslið í fyrsta sinn.

Lögfræðingar Svilar vinna enn að því að finna lausn en litlar líkur eru taldar á að hann fái að spila fyrir Belgíu.