Brasilíski miðjumaðurinn Bruno Guimaraes verður ekki í banni er Newcastle United mætir Manchester United í úrslitaleik enska deildabikarsins á Wembley síðar í þessum mánuði þrátt fyrir að hafa fengið rautt í 2-1 sigrinum á Southampton í undanúrslitunum.
Guimaraes er einn af allra bestu leikmönnum Newcastle og verið einn af þeim sem hefur verið ómissandi á miðsvæðinu frá því hann kom fyrir ári síðan.
Hann fékk rautt spjald í seinni undanúrslitaleiknum gegn Southampton í enska deildabikarnum á þriðjudag en dómari leiksins gaf honum upphaflega gult spjald fyrir tæklingu á Samuel Edozie.
Dómarinn uppfærði það í rautt spjald eftir að hafa séð tæklinguna á VAR-skjánum og því kominn í bann.
Guimaraes verður hins vegar ekki í banni í úrslitaleiknum enda eru agareglurnar ekki aðskildar frá deildinni. Hann mun taka út þriggja leikja bann og verður ekki með gegn West Ham, Bournemouth og Liverpool í deildinni og mætir beint inn í úrslitaleikinn þann 26. febrúar.
Athugasemdir