Alessandro Bastoni
Giuseppe Bergomi, fyrrum landsliðsmaður Ítalíu, segir að varnarmaðurinn Alessandro Bastoni þurfi að yfirgefa landið eftir rauða spjaldið sem hann fékk í tapinu gegn Bosníu og kostaði Ítalíu sæti á HM.
Bastoni, sem er talinn með bestu miðvörðum heims, sá rauða spjaldið undir lok fyrri hálfleiks í úrslitaleiknum gegn Bosníu í landsleikjaglugganum.
Varnarmaðurinn kastaði sér í heimskulega tæklingu á Amar Memic á 41. mínútu og uppskar réttilega rauða spjaldið. Þetta kom liðsfélögum hans í slæm mál en undir lok síðari hálfleiksins jöfnuðu Bosníumenn sem kláruðu síðan dæmið í vítakeppninni.
Bastoni hefur verið orðaður við stærri félög í Evrópu síðasta árið, en Bergomi segir brottför leikmannsins nú óumflýjanlega.
„Hann verður að gæta eigin öryggis og yfirgefa Ítalíu. Við erum að missa einstaklega hæfileikaríkan leikmann, einn af bestu varnarmönnum nútímaboltans. Mér þykir afar leitt að segja þetta, en ég held að sjálfs hans vegna verði hann að finna sér félag í öðru landi,“ sagði Bergomi um Bastoni.
