Evrópa um helgina - Juventus og Milan eigast við - Albert mætir Roma

Ísak Bergmann Jóhannesson og félagar í Köln heimsækja Hoffenheim í fyrsta leik helgarinnar í þýsku deildinni í kvöld. Liðið vann fyrstu tvo leikina en hefur aðeins nælt í eitt stig úr síðustu þremur leikjunum.

Dortmund fær Leipzig í heimsókn á morgun, Leverkusen fær Union Berlin í heimsókn og Bayern heimsækir Frankfurt.

Þórir Jóhann Helgason og félagar í Lecce heimsækja Parma í ítölsku deildinni á morgun. Inter mætir nýliðum Cremonese. Albert Guðmundsson og félagar í Fiorentina fá Roma í heimsókn en Albert lagði upp í sigri liðsins í Sambandsdeildinni í gær. Þá er stórleikur Juventus og MIlan á dagskrá.

Barcelona, topplið spænsku deildarinnar, heimsækir Sevilla. Real Madrid tapaði illa gegn grönnum sínum í Atletico í síðustu umferð en liðið mætir Villarreal á morgun. Atletico heimsækir Celta Vigo.

Real Sociedad hefur verið í miklum vandræðum í fjarveru Orra Steins Óskarssonar en liðið er komið í fallsæti. Sociedad fær Rayo Vallecano í heimsókn sem er með jafn mörg stig í 16. sæti.