Todor Hristov, þjálfari Hattar, var til viðtals hjá Fótbolti.net eftir 0-5 tap sinna manna gegn KA í 32-liða úrslitum Mjólkurbikars karla í dag.
Höttur vann Neista frá Djúpavogi með sömu markatölu, 5-0 í síðustu umferð í bikarnum og því lá beinast við að spyrja Todor hvernig munurinn væri á tilfinningunni.
„Bara svart og hvítt en ég get ekki verið meira stoltur af strákunum í dag, þetta er mjög ungt lið. Við vorum í fyrri hálfleik góðir varnarlega svo á 25. mínútu gerum við mistök í vörninni og þeir skora. Þetta breytir leiknum á móti svona liði sem er mikið á boltann og mikið að færa okkur. Það var erfitt að komast inn í leikinn eftir það fannst mér en ég er mjög stoltur af liðinu mínu.“
Lestu um leikinn: Höttur 0 - 5 KA
Höttur lokaði vel á miðju KA manna framan af leiknum, var það uppleggið, að loka á miðjuna og vera þéttir fyrir?
„Já. Við vildum loka miðjunni mjög vel plús ég bjóst við að það yrði mikið að gera hjá okkur varnarlega séð á köntunum. Þeir eru mjög góðir að ýta bakvörðunum upp og við vorum tilbúnir í það fannst mér. Og það kom mér ekki á óvart að við gerðum vel varnarlega á móti liði sem er í Bestu-deildinni og aðeins dýrara en okkar.“
Þegar Höttur náði aðeins að halda í boltann þá voru þeir jafnfljótir að missa hann þegar þeir fóru aðeins með hann upp á völlinn. Hvað fannst Todor vanta upp á svo liðið hefði mátt gera betur ofarlega á vellinum.
„Mér fannst munurinn líka "physically" séð. Þeir keppa fyrsta leik í Bestu-deildinni eftir viku en hjá okkur er það eftir mánuð þannig það var smá munur þar líka. Þegar við erum búnir að verjast lengi og mikið þá er erfitt að sækja svo en kannski við náum ekki að tengja nógu mikið sem er skiljanlegt en þeir eru gríðarlega sterkir í hvíldarvörn, tilbúnir að pressa aftur og vinna boltann. Þetta er tvennt finnst mér. "Physically" og þeir voru vel skipulagðir þegar þeir töpuðu boltanum.“
Viðtalið í heild sinni má sjá í spilaranum hér að ofan.
