Þróttur komst áfram í 16-liða úrslit Mjólkurbikarsins í dag eftir góðan sigur á ÍBV í Eyjum eftir vítaspyrnukeppni. Fótbolti.net ræddi við Sigurvin Ólafsson, þjálfara Þróttar, eftir leikinn.
Lestu um leikinn: ÍBV 4 - 6 Þróttur R.
„Ég er alveg í skýjunum. Þetta var ógeðslega gaman en erfitt. Þetta var óhefðbundinn undirbúningur, fórum í langan Herjólf í gær og gistum hér, frábært að þetta var þess virði," sagði Venni.
„Við fáum betri færi í fyrri hálfleik og eitt dauðafæri til að komast í 2-0 og svo skot í stöngina. Það voru samt kaflar í leiknum sem Eyjamenn náðu að þrýsta á okkur án þess að búa til færi og það er alltaf stressandi að spila á móti Eyjamönnum og fá þessar eilífu fyrirgjafir á sig og þannig fáum við á okkur þessi mörk."
Margir ungir og efnilegir leikmenn Þróttar fengu tækifæri í dag.
„Ég er stoltur af því hvað það voru margir hreinræktaðir Þróttarar hérna í dag, sérstaklega undir lokin. Allir á vellinum voru gjörsamlega búnir á því, þá vorum við með einhverja sex stráka úr öðrum flokki og einn úr þriðja í hópnum og flestir komu inn á. Er stoltur af því að þeir hafi siglt þessu heim."
