KA og Valur skildu jöfn 1-1 í elleftu umferð Bestu deildarinnar í kvöld. KA hefði hæglega getað náð í stigin þrjú. Fótbolti.net ræddi við Arnar Grétarsson þjálfara KA eftir leikinn.
Lestu um leikinn: KA 1 - 1 Valur
„Smá svekktur að hafa ekki farið með öll þrjú stigin, mér fannst við verðskulda það. Leikurinn var tiltölulega jafn í fyrri hálfleik. Það var bara eitt lið á vellinum í seinni hálfleik," sagði Arnar.
„Við gerum ein stór mistök eftir hornspyrnu þar sem menn gleyma sér og okkur er refsað grimmilega fyrir það og komum okkur í erfiða stöðu útaf því."
„Fyrri hálfleikur var ekkert slæmur, við vorum að spila á móti góðu Valsliði sem hefur verið að vinna síðustu leiki. Eina sem vantaði var þetta annað markið til að gera daginn svolítið skemmtilegri."
Arnar vill meina að KA hefði átt að fá vítaspyrnu þegar Nökkvi Þeyr féll í teignum.
„Ég myndi vilja sjá atvikið aftur með Nökkva, ég held að hann hafi verið með líkamann á milli og hafi verið sparkaður niður. Það er ennþá meira svekkjandi ef þetta hafi átt að vera víti. Þarna var staðan 1-1 og lítið eftir, ég veit ekki hvort það hafi verið út af því að það hafi verið nýbúið að henda einu rauðu spjaldi á loft."
Viðtalið í heild sinni má sjá í spilaranum hér fyrir ofan.