England: Ótrúleg innkoma hjá Harry Wilson í endurkomusigri

Það var ótrúleg dramatík þegar Fulham fékk Brentford í heimsókn í kvöld.

Fulham var með mikla yfirburði í fyrri hálfleik en þvert gegn gangi leiksins skoraði Vitaly Janelt fyrir Brentford um miðjan fyrri hálfleikinn með góðu skoti fyrir utan vítateiginn.

Mark Flekken í marki Brentford átti frábæra tvöfalda markvörslu en meiddist á hné í kjölfarið og Hákon Rafn Valdimarsson fór að hita upp en Flekken náði að jafna sig og því kom fyrsti leikur Hákons í úrvalsdeildinni ekki í kvöld.

Yfirburðir heimamanna voru enn meiri í seinni hálfleik en þeir virtust ekki ætla að ná einhverju út úr leiknum.

Harry Wilson kom inn á sem varamaður og jafnaði metin á glæsilegan hátt í uppbótatíma. Hann var ekki hættur því hann tryggði Fulham sigurinn þegar hann skallaði boltann í netið eftir fyrirgjöf frá Antonee Robinson á lokasekúndum leiksins.