Osimhen fer til Lundúna - Tuchel aftur til Englands - Zidane til Bayern? - Bayern og Liverpool berjast um Alonso
banner
   fös 05. febrúar 2021 22:01
Brynjar Ingi Erluson
Fótbolta.net mótið: Brynjólfur með þrennu er Breiðablik vann A-deildina
Höskuldur Gunnlaugsson fyrirliði Breiðabliks hampar bikarnum í leikslok.
Höskuldur Gunnlaugsson fyrirliði Breiðabliks hampar bikarnum í leikslok.
Mynd: Fótbolti.net - Hulda Margrét
Breiðablik 5 - 1 ÍA
1-0 Gísli Eyjólfsson ('6 )
2-0 Thomas Mikkelsen ('9 )
3-0 Brynjólfur Andersen Willumsson ('13 )
4-0 Brynjólfur Andersen Willumsson ('37 )
5-0 Brynjólfur Andersen Willumsson ('56 )
5-1 Ingi Þór Sigurðsson ('70 )

Lestu nánar um leikinn hér

Breiðablik er meistari í A-deild Fótbolta.net mótsins eftir 5-1 stórsigur á ÍA í úrslitaleiknum á Kópavogsvelli. Brynjólfur Andersen Willumsson skoraði þrennu fyrir Blika.

Gísli Eyjólfsson kom Blikum yfir strax á 6. mínútu. Jason Daði Svanþórsson fékk boltann hægra megin eftir slæma hreinsun frá Skagamönnum. Jason lagði boltann á Gísla í teignum sem skoraði örugglega.

Thomas Mikkelsen bætti við öðru marki þremur mínútum síðar og nú var það Gísli sem lagði upp. Hann átti góða fyrirgjöf á fjærstöng og var Mikkelsen mættur til að stanga boltann í netið.

Stórsókn Blika var ekki búin. Brynjólfur Andersen Willumsson var næstur á blað. Mögnuð skyndisókn Blika þar sem Gísli fékk boltann, lagði hann á Jason sem fann Gísla aftur í lappir. Hann gat skotið á markið en ákvað að leggja hann á Brynjólf sem var í betra færi og skoraði.

Brynjólfur gerði annað mark sitt á 37. mínútu og aftur var það Gísli sem var arkitektinn. Staðan í hálfleik 4-0 fyrir Blikaliðinu sem var að spila stórskemmtilegan fótbolta.

Það kom þá engum á óvart í þeim síðari er Brynjólfur fullkomnaði þrennu sína. Jason Daði átti sendingu á Brynjólf sem lagði boltann á hægri löppina og setti boltann undir Árna Snæ Ólafsson í markinu.

Skagamenn klóruðu í bakkann á 70. mínútu en það var hinn ungi og efnilegi Ingi Þór Sigurðsson sem gerði markið. Hann átti skot sem Anton Ari Einarsson varði en boltinn barst aftur á Inga sem kláraði örugglega í seinni tilrauninni.

Lokatölur 5-1 fyrir Blika sem vinna verðskuldaðan sigur og eru réttilega A-deildarmeistarar þetta árið.
Athugasemdir
banner
banner
banner
banner