England: Chelsea með aðra hönd á titlinum

Ástralska landsliðskonan Sam Kerr gerði bæði mörkin er Chelsea lagði Tottenham að velli í grannaslag í efstu deild kvenna á Englandi.

Liðin mættust í næstsíðustu umferð deildartímabilsins og er Chelsea aðeins einum sigri frá ofurdeildartitlinum.

Chelsea á heimaleik gegn Reading á sunnudaginn í lokaumferðinni og tryggir sér titilinn með sigri. Manchester City er í öðru sæti, tveimur stigum á eftir. Arsenal kemur svo í þriðja og Manchester United í fjórða.

Kerr er markahæst í deildinni með 20 mörk og 6 stoðsendingar.