Besta deildin: KR-ingar fóru illa með færin í Kaplakrika

KR-ingar fóru eflaust svekktir heim úr Kaplakrikanum í kvöld eftir 1-1 jafntefli gegn FH í 17. umferð Bestu deildar karla.

Gestirnir úr Vesturbænum fengu fjölda færa í fyrri hálfleik en Jökull Andrésson varði allt sem á markið kom.

Hann kom þó engum vörnum við á 32. mínútu þegar Luke Rae, sem hafði verið iðinn við kolann, kom KR yfir. Galdur Guðmundsson sendi boltann fram völlinn af eigin vallarhelmingi. Oliver Stefánsson reyndi að tækla, boltinn fór af Ísaki Óla Ólafssyni og aftur af Oliver áður en hann barst til Rae sem kláraði örugglega.

KR-ingar hefðu hæglega getað bætt við mörkum fyrir hlé. Þeir áttu alls sextán skottilraunir í fyrri hálfleiknum, þar af fjórar á markið, en forystan var aðeins eitt mark þegar liðin gengu til búningsklefa.

Rae skoraði mark KR en fór einnig illa með nokkrar góðar stöður. Sú færanýting kom í bakið á Vesturbæingum þegar Kjartan Kári Halldórsson jafnaði á 62. mínútu.

Arnór Borg Guðjohnsen fékk gott pláss hægra megin og lét vaða. Halldór Snær Georgsson varði skotið en boltinn féll fyrir Kjartan Kára sem skilaði honum í vinstra hornið.

FH-ingar voru síðan hársbreidd frá því að komast yfir. Arnór Borg flikkaði hornspyrnu á fjærstöngina þar sem Adolf Daði Birgisson beið, en Halldór Snær var snöggur niður og varði frábærlega.

KR-ingar óðu í færum síðustu tuttugu mínúturnar og með ólíkindum að sigurmarkið skyldi ekki líta dagsins ljós. Ísak Óli bjargaði á marklínu eftir að Aron Sigurðarson hafði komist fram hjá Jökli og Ástbjörn Þórðarson fór síðan illa með frían skalla eftir hornspyrnu.

Lokatölur urðu 1-1 í Kaplakrikanum. Dýrmætt stig fyrir botnlið FH en tvö töpuð stig fyrir KR í toppbaráttunni.

KR er í þriðja sæti með 36 stig en FH án taps í síðustu átta leikjum en samt á botninum með 14 stig.