Mjólkurbikarinn: Aron Sig frábær í sigri KR á Val

KR er komið áfram í 16-liða úrslit Mjólkurbikarsins eftir sigur á Val í Reykjavíkurslag.

Eiður Gauti Sæbjörnsson kom KR yfir snemma leiks. Hann átti skalla beint á Frederik Schram en fékk boltann aftur og skoraði á opið markið.

KR byrjaði leikinn mun betur og Finnur Tómas Pálmason skoraði annað mark liðsins þegar hann skallaði boltann í netið eftir hornspyrnu frá Aroni Sigurðssyni.

KR gerði svo gott sem út um leikinn strax í upphafi seinni hálfleiks þegar Aron skoraði laglegt mark.

Valur náði að klóra í bakkann þegar Birkir Heimisson skallaði boltann í netið en Aron Sig innsiglaði sigur KR undir lokin. Bjarni Mark Antonsson skoraði sárabótamark með góðu skoti fyrir utan teig í uppbótatíma en þá voru úrslitin ráðin. KR verður í pottinum þegar dregið verður í 16-liða úrslit á fimmtudaginn.