Lengjubikar kvenna: KR kom til baka gegn Keflavík

KR-ingar eru með þriggja stiga forystu á toppi B-deildar Lengjubikars kvenna eftir flotta endurkomu í 3-3 jafntefli gegn Keflavík á KR-vellinum í kvöld.

Heimakonur áttu möguleika á að gulltryggja toppsætið gegn Keflavík en það gekk brösuglega.

Ariela Lewis og Eva Dís SIghvatsdóttir komu Keflvíkingum í tveggja marka forystu. Valgerður Gríma Sigurjónsdóttir minnkaði muninn á 35. mínútu áður en Emma Starr tvöfaldaði aftur forystu gestanna.

Í síðari hálfleiknum komu KR-ingar til baka. Karítas Ingvadóttir skoraði á 55. mínútu og jafnaði Valgerður Gríma metin undir lok leiks með öðru marki sínu.

Gæti reynst mikilvægt stig fyrir KR sem var að spila síðasta leik sinn í riðlinum og er nú með 14 stig á toppnum. HK á möguleika á að taka toppsætið en til þess þarf liðið að vinna Gróttu á laugardag.