Aron Sigurðarson, fyrirliði KR, fékk óvænta kveðju frá dóttur sinni í miðjum leik er KR lagði Val af velli í 32-liða úrslitum Mjólkurbikarsins í gærdag.
Lestu um leikinn: KR 4 - 2 Valur
Dóttirin sá sér leik á borði er Aron var að sækja bolta sem hafði farið út fyrir hliðarlínu og greip um pabba sinn og knúsaði hann. Ef marka má myndirnar höfðu áhorfendur í stúku gaman að kveðjunni og sömuleiðis Aron sem tók utan um dóttur sína.
Til þess má geta að kona Arons og móðir stelpunnar, Harpa Rut Ingólfsdóttir, er á myndinni neðst til vinstri og virðist sem svo að hún sé að kalla á dótturina að koma til baka.
Leikar enduðu 4-2 fyrir KR og fór Aron sjálfur á kostum í leiknum þar sem hann skoraði tvö mörk og var valinn maður leiksins.
Hafliði Breiðfjörð var á vellinum og fangaði myndir af atvikinu skemmtilega sem má sjá hér fyrir neðan.
