Carlo Ancelotti stillti upp gríðarlega sterku liði gegn Egyptum en þó ekki sínu besta liði.

Hann hefur breytt liðinu mörgum sinnum síðasta árið, en það verður byggt í kringum Gabriel, Marquinhos, Casemiro, Bruno Guimaraes, Raphinha og Vini Jr.

Guimaraes skoraði einmitt fyrra mark Brasilíu gegn Egyptum í kvöld en Mostafa Ziko jafnaði aðeins nokkrum mínútum síðar.

Endrick kom inn af bekknum í síðari hálfleik og skoraði sigurmark fyrir Brassa. Annar höfuðverkur fyrir Ancelotti, en Endrick spilaði frábærlega síðari hluta tímabilsins með Lyon á láni frá Real Madrid.

Ancelotti fékk annan höfuðverk snemma í leiknum er hægri bakvörðurinn Wesley Franca meiddist sem þýðir að Danilo gæti byrjað fyrsta leik hjá liðinu.

Þetta var síðasti æfingaleikur Brasilíumanna fyrir HM, en fyrsti leikur þeirra á mótinu er gegn Marokkó eftir viku. Ancelotti á Neymar inni sem er að jafna sig af meiðslum, en hann ætti að vera orðinn klár fyrir Marokkóleikinn.

Tyrkland vann 2-1 sigur á Venesúela. Tyrkir lentu undir snemma leiks en Baris Yilmaz jafnaði undir lok fyrri hálfleiks áður en Yunus Akgun, samherji Yilmaz hjá Galatasaray, gerði drauma sigurmark er hann tók boltann á lofti fyrir utan teig og klíndi honum í netið.

Tyrkir eru klárir fyrir HM. Þeir mæta Ástralíu eftir viku, en þeir eru einnig í riðli með Paragvæ og Bandaríkjunum.

Argentína vann Hondúras 2-0. Lautaro Martínez skoraði úr vítaspyrnu og þá gerði Giuliano Simeone annað markið.

Lionel Messi var ónotaður varamaður í annars mjög sannfærandi sigri heimsmeistaranna.

Argentína mætir Íslandi í síðasta æfingaleiknum fyrir HM en hann er spilaður í Auburn í Alabama klukkan 01:00 aðfaranótt miðvikudags. Messi mun væntanlega spila þann leik fyrst hann var hvíldur í nótt.

Dick Advocaat og lærisveinar hans í Curacao unnu 4-0 sigur á Arúba og þá marði Suður-Afríka 1-0 sigur á Jamaíku.

Brasilía 2 - 1 Egyptaland
1-0 Bruno Guimaraes ('7 )
1-1 Mostafi Ziko ('11 )
2-1 Endrick ('52 )

Venesúela 1 - 2 Tyrkland
1-0 Gleiker Mendoza ('13 )
1-1 Baris Yilmaz ('44 )
1-2 Yunus Akgun ('54 )

Argentína 2 - 0 Hondúras
1-0 Lautaro Martínez (‘37, víti )
2-0 Giuliano Simeone (‘54 )

Curacao 4 - 0 Arúba
1-0 Joshua Brenet (‘53 )
2-0 Jeremy Antonisse (‘68 )
3-0 Livano Comenencia (‘83 )
4-0 Juninho Bacuna (‘90 )

Jamaíka 0 - 1 Suður- Afríka
0-1 Oswin Appollis (‘32 j


Allir 104 leikirnir á HM verða í beinni á RÚV.

Samfelldar útsendingar frá því síðdegis og fram á nótt.

Kvöldin verða geggjuð í sumar!