Þór skákaði bræðrum sínum og föður

Þegar Þór Andersen Willumsson skoraði sigurmark Breiðabliks gegn ÍA á Akranesi, 2-1, nýkominn inn á sem varamaður, varð hann þriðji bróðirinn til að skora í efstu deild karla og sá fjórði í fjölskyldunni því faðir hans, Willum Þór Þórsson, núverandi forseti ÍSÍ, er líka á markalista deildarinnar.

Eins og bræðurnir og landsliðsmennirnir Willum Þór Willumsson og Brynjólfur Willumsson sem báðir leika í hollensku úrvalsdeildinni, með Nijmegen og Groningen.

Þór skákaði hins vegar bæði bræðrum sínum og föður því hann varð fljótastur þeirra allra til að skora í efstu deild. Þetta var aðeins annar leikur hins 17 ára gamla Þórs með Blikunum í deildinni.

Willum Þór faðir hans skoraði í sínum sjöunda leik, fyrir KR gegn ÍA árið 1981, Willum Þór bróðir hans skoraði í sínum tíunda leik, fyrir Breiðablik gegn ÍBV árið 2018, og Brynjólfur þurfti að bíða lengst því hann skoraði í sínum 18. leik fyrir Breiðablik í deildinni, gegn KA árið 2019.

Faðirinn, Willum Þór, á langlengstan feril að baki í deildinni af þeim feðgum en hann lék 160 leiki fyrir KR, Breiðablik og Þrótt og skoraði í þeim 23 mörk. Willum Þór yngri lék 28 leiki í deildinni fyrir Breiðablik og skoraði 6 mörk áður en hann fór í atvinnumennsku og Brynjólfur lék 41 leik fyrir Breiðablik og skoraði 7 mörk. Þór er kominn með eitt mark eftir aðeins tvo leiki.

Á stuðningsmannavefnum Blikar.is er sagt frá því að þetta sé annað bræðraþríeykið í sögu Breiðabliks sem skorar í efstu deild karla. Áður hafi bræðurnir Jóhann Grétarsson (2 mörk), Sigurður Grétarsson (31) og Arnar Grétarsson (20) allir skorað fyrir Blika í deildinni. Faðir þeirra, Grétar Kristjánsson, skoraði 20 mörk fyrir félagið í næstefstu deild á árunum 1960-1967.