Sævar Atli Magnússon hefur farið frábærlega af stað með Brann á tímabilinu. Hann gekk til liðs við félagið í lok maí og hefur síðan þá skorað tíu mörk í sextán leikjum, þar af fimm í Evrópukeppnum.
Sævar er í landsliðshópnum sem mætir bæði Úkraínu og Frakklandi en Fótbolti.net ræddi við Sævar Atla fyrr í dag á hóteli landsliðsins um landsliðsverkefnið og frábæru byrjun hans í Bergen í Noregi.
„Byrjunin er búin að vera geggjuð, ég skoraði í fyrsta leik og síðan er þetta búið að halda áfram. Ég er búinn að vinna mig í liðið sem er mjög mikilvægt, það er mjög mikil samkeppni í öllum stöðum í Brann, mjög margir góðir leikir. Og það er mikið af leikjum hjá okkur, spilum í Evrópu, kepptum um að komast áfram í Evrópu og síðan leikir um efstu sætin í deildinni. Þetta er bara geðveikt, búið að ganga vel og vonandi heldur það áfram.“
Frammistaða Sævars hefur hlotið mikið lof og eru fjölmiðlar í Bergen ánægðir með leikmanninn.
„Fjölmiðlarnir í Bergen geta flakkað frá himnaríki til helvítis. Þeir geta hrósað manni mikið og gagnrýnt mann mikið. Núna er ég búinn að fá gælunafnið Evrópu-Sævar, það er mjög fínt. Mjög gaman að skora í Evrópu og vonandi heldur það áfram. Gaman að vinna, við erum búnir að fá þrjú stig vonandi og setja pressu á okkur að komast áfram.“
Sævar leikur ásamt Eggerti Aroni Guðmundssyni í Brann og eru þeir þar undir stjórn Freys Alexanderssonar en hann stýrði Sævari jafnframt í Lyngby.
„Það er gaman, Eggert er toppmaður og við erum búnir að ná vel saman. Alltaf gott að hafa Íslending með sér. Síðan þekki ég Freysa og aðstoðarþjálfarann, geðveikt að vinna með þeim. Þekki þá vel og vann með þeim hjá Lyngby. Sumir segja að ég spili best undir honum (Frey), það gæti alveg passað.
Viðtalið við Sævar má sjá í spilaranum hér að ofan.
