Kári í leiknum gegn Frökkum í mars síðastliðnum.
„Þetta er verðugt verkefni. Þetta er besta lið í heimi. Við höfum sýnt að það getur allt gerst á heimavelli og við ætlum að koma 100% stemmdir í þennan leik," segir landsliðsmaðurinn Kári Árnason um leikinn sem er framundan gegn Frakklandi á föstudagskvöld.
Ísland tapaði 5-2 gegn Frakklandi í 8-liða úrslitum EM og 4-0 í undankeppni EM fyrr á árinu. Í fyrra skildu liðin jöfn 2-2 í æfingaleik í Guingamp í Frakklandi.
„Þetta er hörkulið og erfitt að stoppa það. Við höfum ekki náð að stoppa þá áður. Við þurfum að spila þetta svolítið eins og í æfingaleiknum í Frakklandi. Við vorum komnir í 2-0 þar og vorum klaufar að klára það ekki. Sjálfstraustið var þannig að þetta hékk allt saman og gekk mjög vel. Þetta er spurning um að halda þeim dampi."
Kári tognaði aftan í læri gegn Albaníu fyrir mánuði síðan en hann náði að snúa aftur í lið Víkings í lokaumferð Pepsi Max-deildarinnar um mánaðarmótin.
„Það var mjög mikilvægt. Ég setti stefnuna alltaf á að ná 1-2 leikjum til að komast í betra stand fyrir þessa leiki," sagði Kári.
Hér að ofan má sjá viðtalið í heild sinni.
