Fréttamannafundur Guardiola stóð yfir í þrjár mínútur

Fyrsta spurningin á fréttamannafundinum var hvort hann myndi hitta eigendur félagsins í landsleikjaglugganum og ræða samningamál sín.

Svar Guardiola var einfalt: „Nei."

Mikið hefur verið fjallað um langan meiðslalista City. Guardiola segir að staðan á leikmannahópnum sé óbreytt og Jack Grealish því enn ekki klár. Var hann þá spurður að því af hverju Grealish hefði verið valinn í enska landsliðshópinn?

„Það er spurning fyrir landsliðsþjálfara Englands," svaraði Guardiola en City mætir Brighton á morgun klukkan 17:30.

Um gengi síns liðs sagði Guardiola: „20 mínútur gegn Fulham voru slæmar, við vorum slakir gegn Bournemouth en í öðrum leikjum vorum við góðir. Við erum góðir og leikmenn mínir hafa oft sýnt hvað í þeim býr. Sjáum hvað gerist."

Guardiola hrósaði þá Fabian Hurzeler, stjóra Brighton, og segist hafa hrifist af spilamennsku liðsins. Til dæmis gegn Liverpool um síðustu helgi.