Víkingur sótti þrjú mikilvæg stig í Egilshöllina í kvöld þegar þeir lögðu Fylkismenn 2-3 í hörku fótboltaleik. Logi Ólafsson þjálfari Víkings var að vonum sáttur með að vinna sinn annan leik í röð á útivelli.
Lestu um leikinn: Fylkir 2 - 3 Víkingur R.
„Ég er fyrst og fremst ánægður með að við skorum þrjú mörk og unnum leikinn og vorum virkilega sterkir í fyrri hálfleik. Fylkir hafa náð í 9 stig í þessu húsi svo þetta er erfiður völlur að koma og sækja stig á."
Víkingar hafa nú unnið tvo leiki í röð, báða á útivelli, Logi var ánægður með sigurinn en var ekki sáttur með að þeir hleyptu Fylki aftur inn í leikinn.
„Það segir sig sjálft að fara í Vesturbæinn og halda markinu hreinu og vinna leikinn er mjög gott. Þetta leit virkilega vel út hér í hálfleik þar sem við héldum að við værum að vinna þægilegan sigur en við hleypum þeim inn í leikinn og þá er voðinn vís."
Rick Ten Voorde framherji Víkings fór meiddur af velli og Gunnlaugur Hlynur og Jörgen Richardsen voru ekki með vegna meiðsla, þeir ættu þó að vera klárir í næsta leik að sögn Loga.
„Hann er stífur aftan í lærinu og við vildum ekki taka neinar áhættur með hann svo hann myndi ekki togna. Gunnlaugur og Jörgen ættu að vera tilbúnir í næsta leik, þeir eru bara smávægilega meiddir."
Kári Árnason er klár í slaginn hjá Víkingum en Logi vildi ekki taka sénsinn á að spila honum á þurru gervigrasi eftir að hafa verið á góðu grasi í Rússlandi.
Við mátum það þannig að það væri ekki gott að koma af flottu grasi í Rússlandi og á nánast þurtt gervigras í Egilshöll. Hann er tilbúinn og við sjáum til hvort hann verði í liðinu í næsta leik."
Athugasemdir