Þýskaland: Ísak og félagar hleyptu lífi í botnbaráttuna

Ísak Bergmann Jóhannesson lék allan leikinn á miðjunni hjá FC Köln í tapi á heimavelli gegn Heidenheim. Leikurinn var nokkuð jafn en gestirnir nýttu færin sín betur svo lokatölur urðu 1-3.

Köln var búið að bjarga sér frá falli fyrir upphafsflautið í dag á meðan Heidenheim reynir að afreka hið ótrúlega í botnbaráttunni. Liðið virtist öruggt að falla niður um deild en er búið að vinna þrjá af síðustu fimm deildarleikjum, auk þess að ná jafntefli við Þýskalandsmeistara FC Bayern, og á núna möguleika á að komast í umspilssæti um áframhaldandi þátttöku í deildinni.

Þriðja neðsta lið þýsku deildarinnar spilar umspilsleiki við þriðja sætið úr næstefstu deild. Eins og staðan er eftir sigur Heidenheim þá eru botnliðin þrjú öll jöfn á stigum fyrir lokaumferðina.

Heidenheim, Wolfsburg og St. Pauli eiga 26 stig eftir 33 umferðir en Wolfsburg er með bestu markatöluna, eða 26 mörk í mínus. Heidenheim og St. Pauli eru með 29 mörk í mínus.

Heidenheim á heimaleik við Mainz, sem siglir lygnan sjó, í lokaumferðinni á meðan St. Pauli og Wolfsburg eigast við í gríðarlega mikilvægum innbyrðisslag.

Það er því mjög mikil spenna fyrir lokaumferð tímabilsins í botnbaráttunni.