Unai Emery er ekki að hugsa um Arsenal

Emery sat á fréttamannafundi í gær og var meðal annars spurður hvort hann hyggðist hvíla einhverja lykilmenn í kvöld til að hafa þá ferska og undirbúna fyrir stórleikinn sem er framundan gegn Arsenal í ensku úrvalsdeildinni á sunnudaginn.

„Ég er ekki að hugsa um leikinn um helgina, ég og allir aðrir innan félagsins erum einungis að hugsa um næsta leik gegn Lille. Við setjum alla okkar einbeitingu á þann leik og munum hugsa um næstu leiki þegar að þeim kemur," svaraði Emery, sem hefur unnið Evrópudeildina fjórum sinnum á þjálfaraferlinum.

„Við erum að öðlast dýrmæta reynslu og það mikilvægasta fyrir okkur er að vera samkeppnishæfir og að reyna að ná sem bestum árangri. Við erum spenntir fyrir lokakafla tímabilsins."