Ómar Ingi Guðmundsson þjálfari HK var hæstánægður með lið sitt eftir að þeir unnu 3-1 heimasigur gegn Þór í dag.
Lestu um leikinn: HK 3 - 1 Þór
„Ég er bara virkilega ánægður og stoltur af því hvernig strákarnir komu í leikinn þó að við höfum ekki skorað fyrr en í seinni hálfleik. Þeir gerðu það sem ég bað þá um og við þjálfarateymið báðum þá um. Við vorum aldrei að fara tapa þessum leik, það voru einhverjir 6, 8 gæjar úr 6. flokki mættir fyrir 2 með trommur að syngja þegar leikmennirnir mættu. Þó að við vorum lentir 1-0 undir þá hafði ég engar áhyggjur af því hvort við myndum vinna þennan leik.
Það gekk erfiðlega að skapa mikla hættu en HK skoraði 3 mörk í seinni. Hálfleiksræðan hefur gert sitt.
„Ég sagði svo sem ekkert mikið, ég sagði bara við þá að við þyrftum bara að hlaupa aðeins óeigingjarnari hlaup, sleppa aðeins frá okkur beislinu nálægt teig og vera bara hugrakkari. Við vorum að komast upp að teig allan fyrri hálfeikinn líka þannig þetta var bara tímaspursmál hvenær þetta myndi koma."
HK hefur tekið 3 sigra úr 5 leikjum í byrjun tímabils og þeir stefna upp um deild.
„Mér líst bara mjög vel á þetta. Jú við byrjuðum fyrsta leik erfiðlega og töpuðum hérna á heimavelli og svo gegn Gróttu var Brynjar nýfarinn og smá svona rót á okkur. En við höfum bara allir saman staðið þétt við bakið á hvort öðru og erum bara mjög fókuseraðir á það að láta sumarið ganga vel."
Mörkin hjá HK í dag komu frá 3 mismunandi mönnum og Ómar var ánægður með að sjá þetta dreifast á liðið.
„Jú það er frábært og þegar Birkir Valur er farinn að skora með vinstri í annað skiptið á þessu ári þá er ég bara helvíti sáttur"
Viðtalið má sjá í heild sinni í spilaranum hér fyrir ofan.
