„Gætu ekki skipulagt fyllerí í brugghúsi"

Keane var einn af þeim sem kom til greina áður en Heimir var ráðinn og það var rætt við hann um starfið. Keane var spurður út í þetta af Gary Neville, fyrrum liðsfélaga sínum hjá Man Utd, í nýlegu hlaðvarpi.

Þá sagði hann: „Já, auðvitað. En ég held að þeir hafi rætt við alla sem heita Tom, Dick eða Harry."

„Ég ræddi við þá um starfið en það var ákveðinn farsi. Það eru mjög margir á síðustu sex mánuðum sem hafa komið fram og sagt að þeim hafi verið boðið starfið. En þannig er írska fótboltasambandið, þeir gætu ekki skipulgt fyllerí í brugghúsi," sagði Keane.

Það voru margir orðaðir við starfið hjá Írlandi áður en Heimir tók við, en írska sambandið tók gríðarlega langan tíma í að ráða nýjan landsliðsþjálfara.

Keane spilaði 67 landsleiki fyrir Írland og var aðstoðarlandsliðsþjálfari frá 2013 til 2018. Hann hefur áhyggjur af stöðu mála.

„Þú horfir á þjálfarann og þú óttast um liðið, þeir eru í vandræðum. Það er löng leið til baka. En írska sambandið þarf líka að taka til hjá sér. Það þarf alvöru fólk í vinnu þarna. Ég vonast til að þjálfarinn (Heimir) nái sér á strik og fari að ná í úrslit, en þetta lítur ekki vel út," sagði Keane.