Guðrún Arnardóttir, varnarmaður Breiðabliks, er gengin til liðs við Djurgarden í Svíþjóð. Guðrún skrifaði undir eins árs samning við Djurgarden þetta staðfesti Brjánn Guðjónsson, umboðsmaður hennar í samtali við Fótbolta.net.
Guðrún átti mjög gott sumar og var valinn í úrvalslið tímabilsins er Breiðablik hampaði Íslandsmeistaratitlinum.
Guðrún hóf ferilinn með Selfossi árið 2011 og var fengin yfir til Blika þar sem hún hefur verið í lykilhlutverki undanfarin sex ár.
Síðustu ár hefur hún einnig stundað nám við háskóla í Bandaríkjunum og gert góða hluti í háskólaboltanum þar.
Guðrún á 135 meistaraflokksleiki að baki hér á landi og hefur leikið 5 A-landsleiki.
Djurgarden endaði í 8. sæti af tólf liðum í sænsku úrvalsdeildinni á síðasta tímabili en landsliðskonurnar Guðbjörg Gunnarsdóttir og Ingibjörg Sigurðardóttir leika með liðinu.
Athugasemdir
