Mikil vonbrigði hjá Aftureldingu og Þór - Bæði lið skipta um markmann

Báðum liðum var spáð góðum árangri fyrir tímabilið en hvorugu liðinu hefur tekist að standa undir því en liðin eru bæði með 14 stig í 8. og 9. sæti deildarinnar.

Arnar Daði Jóhannesson hefur verið í markinu hjá Aftureldingu í sumar en Birkir Haraldsson kemur í markið í dag. Birkir er að spila sinn þriðja leik í sumar þar sem Arnar tók út leikbann fyrr á tímabilinu.

Arnar varð fyrir því óláni að skora sjálfsmark þegar Afturelding tapaði 3-0 gegn ÍR í síðustu umferð.

„Hann tapaði ekki leiknum í dag, við gerðum það. Allir sem komu við sögu og við sem stöndum fyrir utan þetta. Við ógnuðum varla markinu þeirra í leiknum. Auðvitað á hann að gera betur í þessu augnabliki en það var svo margt annað sem var að." sagði Magnús Már í samtali við fótbolta.net eftir leikinn.

Auðunn Ingi Valtýsson er í marki Þórs í dag á kostnað Arons Birkis Stefánssonar. Auðunn hefur aðeins spilað þrjá leiki með Þór í næst efstu deild en hann lék með Dalvík/Reyni í 2. deild síðasta sumar. Aron Birkir er fyrirliði Þórs en Fannar Daði Malmquist Gíslason tekur við fyrirliðabandinu í dag.

Þór missti forskot niður í jafntefli gegn níu leikmönnum Grindavíkur í síðustu umferð þar sem Aron Birkir hefði átt að gera betur þegar Grindavík jafnaði metin á lokamínútu venjulegs leiktíma.