England: Þægilegt fyrir Brighton gegn Chelsea

Í kvöld tók Brighton á móti Chelsea í annað sinn á einni viku og skóp aftur sigur rétt eins og í bikarnum.

Chelsea byrjaði af krafti og gerðu lærisveinar Enzo Maresca sig líklega til að skora á upphafsmínútunum en krafturinn var ekki lengi að detta úr þeim. Noni Madueke meiddist á 21. mínútu og tóku heimamenn í Brighton forystuna skömmu síðar.

Kaoru Mitoma skoraði þá glæsilegt mark eftir langa sendingu upp völlinn frá Bart Verbruggen markverði. Mitoma náði magnaðri fyrstu snertingu á boltann, lagði hann fyrir sig og kláraði með góðu skoti.

Yankuba Minteh tvöfaldaði forystuna með góðu marki eftir sendingu frá Danny Welbeck og endurtóku þeir félagarnir leikinn í seinni hálfleik til að bæta þriðja markinu við.

Brighton var sterkari aðilinn í síðari hálfleik og hefði getað unnið stærra, en lokatölur urðu 3-0.

Brighton er í áttunda sæti eftir þennan sigur, fjórum stigum frá Evrópusæti. Chelsea er í fjórða sæti en getur misst það niður um helgina og endað svo lágt sem í sjötta sæti.