2. deild: Skoraði þrennu í dramatískum sigri

Patrekur Orri Guðjónsson átti stórkostlega frammistöðu er Hvíti riddarinn vann dramatískan 4-3 sigur á KFA í 2. deild á Malbikstöðinni að Varmá í dag.

Framherjinn kom Hvíta riddaranum í tveggja marka forystu á átta mínútna kafla í fyrri hálfleik. Hann skoraði fyrsta markið á 18. mínútu og annað á 26. mínútu.

Þór Sigurjónsson skoraði fyrir KFA á 34. mínútu en heimamenn svöruðu og komust aftur í tveggja marka forystu mínútu síðar er Sindri Sigurjónsson skoraði.

Þór gerði annað mark sitt undir lok fyrri hálfleiks og jafnaði Jawed Abd El Resak Boumeddane metin með marki úr vítaspyrnu í upphafi síðari hálfleiks.

Ástþór Ingi Runólfsson, leikmaður Hvíta riddarans, fékk að líta gula spjaldið á 81. mínútu og aðeins sex mínútum síðar var hann rekinn af velli.

Það kom ekki að sök því stuttu síðar fengu heimamenn vítaspyrnu og var það Patrekur sem fór á punktinn og fullkomnaði þrennu sína og tryggði um leið sigurinn.

Stór þrjú stig hjá Hvíta sem er í 8. sæti deildarinnar með 10 stig en KFA í sætinu fyrir neðan með 9 stig.