Meiðslavandræðin sem eru að hrjá Everton virðast engan endi ætla að taka og staðfesti Frank Lampard knattspyrnustjóri að Yerry Mina verður frá í um 8 vikur.
Kólumbíski miðvörðurinn meiddist í 0-1 tapi gegn Chelsea í fyrstu umferð. Hann meiddist á liðbandi í ökkla og missir af að minnsta kosti 9 leikjum til viðbótar.
Lampard greindi frá þessu eftir 2-1 tap Everton á útivelli gegn Aston Villa í gær.
Everton hefur farið illa af stað á úrvalsdeildartímabilinu en er ekki að tapa leikjum með miklum mun.
Félagið seldi Richarlison í sumar og er ekki búið að styrkja sig mikið en helstu vandræðin stafa af meiðslum.
Dominic Calvert-Lewin er meiddur ásamt Allan, Abdoulaye Doucoure, Andre Gomes, Ben Godfrey og Andros Townsend. Everton er með alltof þunnan leikmannahóp til að höndla svona mörg meiðsli.