Lengjudeildin: Ótrúlegar tölur á Seltjarnarnesi

Það voru ótrúleg úrslit í eina leik kvöldsins í Lengjudeildinni í kvöld þar sem Grótta gjörsamlega niðurlægði Aftureldingu.

Þetta var næst síðasti leikurinn í næst síðustu umferð deildarinnar.

Pétur Theódór Árnason, sem mun fara í Breiðablik eftir tímabilið, skoraði eftir sex mínútur. Áður en flautað var til hálfleiks hafði hann alls skorað fjögur mörk, en tvö þeirra komu á síðustu andartökum fyrri hálfleiksins.

Kristófer Melsted og Kjartan Kári Halldórsson skoruðu einnig fyrir Gróttu, og var staðan 6-0 í hálfleik!

Gabríel Hrannar Eyjólfsson gerði sjöunda markið snemma í seinni hálfleiknum og Kjartan Kári gerði sitt annað mark þegar tíu mínútur voru eftir af venjulegum leiktíma.

Hreint út sagt ótrúlegar tölur í þessum leik. Grótta er í fimmta sæti og Afturelding í níunda sæti.