Matti með bikarinn.
Matthías Vilhjálmsson var í tapliðinu í úrslitaleik Mjólkurbikarsins í fyrra þegar FH laut í lægra haldi gegn Víkingum. Í dag var hann í sigurliðinu er Víkingar unnu KA á Laugardalsvelli. Matthías var frábær í leiknum en hann spilaði í miðverðinum.
Lestu um leikinn: Víkingur R. 3 - 1 KA
„Þetta er einstakur hópur. Þetta sumar er búið að vera lygilegt," sagði Matthías við Fótbolta.net eftir leikinn.
Matthías gekk í raðir Víkings frá FH fyrir tímabilið en á undirbúningstímabilinu talaði Arnar Gunnlaugsson, þjálfari Víkings, um að Matti væri með tapsjúkdóm sem þyrfti að lækna hann af. Það er óhætt að segja að hann sé læknaður.
„Ég sagði við hann um daginn að þetta hefði verið snilldarmove hjá honum að taka gæja sem hefur afrekað nokkuð mikið á ferlinum og stuða aðeins liðið. Ég var alveg með breitt bak. Það var ekkert geggjað að heyra þetta, en hann var að kveikja líf í mér og liðinu. Tímabilið er búið að vera fáránlega gott. Þetta er einstakur hópur og einstakt þjálfarateymi, stuðningurinn er líka geggjaður."
Matthías var frábær í leiknum en hann spilaði í miðverðinum. Það er ekki staða sem hann er vanur en hann virðist geta leyst allar stöður á vellinum.
„Ég veit ekki hvað þú getur kallað mig. Ég var vinstri bakvörður um daginn líka. Ég á eftir að prófa að taka markið áður en ég hætti. Ég verð að viðurkenna að það smá fiðringur í mér fyrr í vikunni þegar Arnar kallaði mig inn á fund og sagðist vera með 'grand plan' fyrir leikinn. Síðan kíkti ég á liðið hjá honum og ég sá ekki nafnið mitt. Síðasta staðan sem ég tékkaði á var miðvörðurinn og þar var ég. Arnar er einstakur þjálfari og það eru forréttindi að fá að upplifa þennan fótboltaheila sem hann er. Þjálfarateymið í kringum hann er geggjað líka."
Hægt er að sjá allt viðtalið í spilaranum hér að ofan.
Athugasemdir
