Carlos Zambrano, varnarmaður Perú, hefur sent Neymar, leikmanni Paris Saint-Germain, væna pillu eftir leik Perú og Brasilíu á þriðjudag.
Neymar skoraði þrennu í 4-2 sigri Brasilíu í undankeppni HM og fiskaði einnig tvær vítaspyrnur fyrir sitt lið.
Zambrano veit af hæfileikum leikmannsins en kallar hann á sama tíma trúð sem lætur sig detta víðsvegar á vellinum.
„Ef ég á að vera hreinskilinn þá er hann frábær leikmaður og einn sá besti í heiminum en að mínu mati þá er hann algjör trúður," sagði Zambrano.
„Neymar veit af öllu sem hann gerir á vellinum, hann er frábær leikmaður en hann leitaði eftir öllum aukaspyrnum."
„Hann henti sér fjórum eða fimm sinnum niður í vítateignum til að sjá hvort hann myndi fá víti og loks náði hann markmiðinu. Þeir fengu tvö víti sem voru ekki rétt dæmd."
Athugasemdir