Þýskaland: Gregoritsch sá um Gladbach í toppbaráttunni

Schalke fékk Borussia Mönchengladbach í heimsókn í þýsku toppbaráttunni og var staðan markalaus eftir nokkuð jafnan fyrri hálfleik.

Heimamenn byrjuðu seinni hálfleikinn mjög vel og skoraði Suat Serdar með góðu skoti við vítateigsbogann eftir sendingu frá Michael Gregoritsch.

Austurríski sóknartengiliðurinn Gregoritsch er nýgenginn til liðs við Schalke, á lánssamningi frá Augsburg. Gregoritsch tvöfaldaði forystu Schalke tíu mínútum síðar eftir góða skyndisókn.

Gestirnir frá Mönchengladbach reyndu sitt besta til að minnka muninn og átti mikið af marktilraunum síðasta hálftíma leiksins, en inn vildi boltinn ekki.

Gladbach er áfram í öðru sæti þýsku deildarinnar en Schalke er komið upp í þriðja sæti, tveimur stigum á eftir.