England um helgina - Liverpool heimsækir Brentford á morgun

22. umferð í ensku úrvalsdeildinni hefst í hádeginu á morgun þegar Newcastle fær Bournemouth í heimsókn.

Þar mætast tvö sjóðandi heit lið en Newcastle hefur unnið átta leiki í röð og Bournemouth ekki tapað í síðustu níu leikjum. Brentford fær Liverpool í heimsókn, topplið Liverpool hefur gert tvö jafntefli í röð en Brentford náði í gott stig gegn Man City í síðustu umferð.

Arsenal má ekki við því að tapa stigum í toppbaráttunni og Aston Villa er í hörku Evrópubaráttu, liðin eigast við á Emirates seinni partinn á morgun.

Everton fær Tottenham í heimsókn en Ange Postecoglou situr í ansi heitu sæti. Man Utd hefur ekki verið sannfærandi undir stjórn Ruben Amorim en liðið vann endurkomusigur gegn botnliði Southampton í gær. Liðið fær Brighton í heimsókn sem lagði Ipswich einnig í gær.

Ipswich fær Man City í heimsókn sem heldur áfram að ströggla í deildinni. Umferðinni lýkur á mánudagskvöldið með leik Chelsea og Wolves.