Evrópudeildin í dag - Man Utd og Tottenham þurfa sigra

Seinni leikirnir í 8-liða úrslitum Evrópudeildarinnar fara fram í kvöld.

Man Utd var með unninn leik í höndunum áður en Rayan Cherki jafnaði metin fyrir Lyon í uppbótatíma í fyrri leiknum. Liðin mætast á Old Trafford í kvöld og United þarf á sigri að halda.

Tottenham er einnig í jafnri stöðu fyrir útileik gegn Frankfurt í kvöld. Ljóst er að tímabilið hjá United og Tottenham er búið að vera mikil vonbrigði en bæði lið ætla sér sigur í þessari keppni.

Þá vann Bodö/Glimt frábæran sigur á Lazio í Noregi í fyrri leiknum en Rangers og Bilbao gerðu markalaust jafntefli í Skotlandi.