Besta deildin: Sigurmark undir lokin í Garðabæ

Stjarnan vann erkifjendur sína í FH, 3-2, í 2. umferð Bestu deildar karla á Samsung-vellinum í Garðabæ í kvöld. Andri Rúnar Bjarnason gerði sigurmarkið undir lok leiks eftir að hafa komið inn á sem varamaður.

Stjörnumenn voru með völdin stærstan hluta fyrri hálfleiksins og áttu orrahríð að marki FH-inga. Emil Atlason fékk tvö færi á fyrstu tíu mínútunum en Jökull Andrésson sá við honum í bæði skiptin.

Örvar Eggertsson fékk besta færið á 12. mínútu. Guðmundur Baldvin Nökkvason átti frábæra sendingu í gegn og á Örvar sem var fljótari en allir og náði að vippa boltanum yfir Jökul í markinu en boltinn rétt framhjá.

Jökull var aftur kallaður til á 21. mínútu. FH-ingar hreinsuðu burt hornspyrnu Stjörnumanna og alla leið niður á Árna Snæ Ólafsson sem kom með langan á Emil sem náði skoti en Jökull varði vel.

Eftir öll þessi færi Stjörnumanna hlaut markið að koma, en það gerðist fjórum mínútum síðar. Benedikt Warén færði boltann hægra megin á Örvar sem gaf fastan bolta á Birni Snæ Ingason sem kláraði færið vel.

Stjarnan missti lykilmann sinn, Emil, af velli á 36. mínútu og inn kom Andri Rúnar og átti hann eftir að skipta sköpum fyrir sína menn.

Á lokamínútum fyrri hálfleiks fengu FH-ingar vítaspyrnu sem Stjörnumenn geta verið svekktir með. Örvar og Ísak reyndu báðir að henda sér fyrir lausan bolta og Örvar fyrstur í boltann en fór síðan í Ísak. Strangur dómur en vítaspyrna dæmd og skoraði Kjartan Kári Halldórsson úr vítinu.

Staðan í hálfleik 1-1, en það voru FH-ingar sem tóku forystuna þegar fimmtán mínútur voru liðnar af þeim síðari er Tómas Orri Róbertsson fékk að keyra fram völlinn, lét síðan vaða fyrir utan teig í stöng og inn. Stórkostlegt skot og Hafnfirðingar óvænt komnir í forystu.

Stjörnumenn voru ekki lengi að svara. Fimm mínútum síðar jafnaði Guðmundur Baldvin af stuttu færi. Jóhann Árni Gunnarsson átti fyrirgjöf á Benedikt sem skallaði í átt að marki. Jökull varði skallann en þó ekki lengra en út á Guðmund sem gat ekki annað en sett boltann í markið.

Leikurinn róaðist töluvert eftir jöfnunarmarkið en það voru Stjörnumenn sem voru líklegri til að ná inn sigurmarki frekar en FH-ingar.

Þeir náðu því þegar fimm mínútur voru eftir og var það eftir stórglæsilegan undirbúning frá Samúel Kára Friðjónsson sem átti þessa geggjuðu sendingu inn á teiginn á Andra Rúnar Bjarnason sem var kominn í góða stöðu inn á teignum og setti boltann í markið.

Annar sigur Stjörnunnar sem er með fullt hús eins og KR á meðan FH er aðeins með eitt stig.