England í dag - Chelsea mætir Man Utd á Stamford Bridge

Dagskráin hefst klukkan 11:30 með Lundúnaslag Brentford og Fulham. Bæði lið eru í kringum Evrópusvæðið en Brentford er í 7. sæti og á möguleika að komast upp fyrir Chelsea á meðan Fulham er í 12. sæti með 44 stig, aðeins þremur stigum frá Brentford.

Fallbaráttulið Leeds mætir botnliði Wolves klukkan 14:00. Leeds getur farið langleiðina með að senda Wolves niður.

Á sama tíma hefst leikur Newcastle og Bournemouth. Newcastle þarf sigur til að eiga einhvern möguleika á að lauma sér inn í Evrópukeppni á næsta tímabili en liðið er í 14. sæti á meðan Bournemouth er í 11. sæti með 45 stig og ekki tapað leik síðan í byrjun janúar.

Tottenham, sem er í fallsæti með 30 stig, mætir Brighton í Lundúnum.

Þetta er annað árið í röð þar sem Tottenham er að berjast um að halda sæti sínu í deildinni og eiginlega hálf ótrúlegt að lið með þennan hóp sé í þessari stöðu. Brighton er á meðan að berjast um Evrópusæti en liðið er í 9. sæti með 46 stig, tveimur stigum frá sæti í Evrópudeildina.

Klukkan 19:00 er síðan alvöru slagur um Meistaradeildarsæti er Chelsea tekur á móti Manchester United. Chelsea er að upplifa slæman kafla undir stjórn Liam Rosenior, en liðið er í 6. sæti með 48 stig, fjórum stigum frá Liverpool sem er í síðasta Meistaradeildarsætinu. Man Utd er í 3. sæti með 55 stig og ekki enn búið að tryggja sig í deild þeirra bestu á næstu leiktíð, en tap í dag gæti sett allt í uppnám.

Leikir dagsins:
11:30 Brentford - Fulham
14:00 Leeds - Wolves
14:00 Newcastle - Bournemouth
16:30 Tottenham - Brighton
19:00 Chelsea - Man Utd