Davíð Smári Lamude þjálfari Vestra var svekktur með úrslit dagsins eftir að liðið hans tapaði fyrir Fram 1-0.
Lestu um leikinn: Fram 1 - 0 Vestri
„Þetta var óþarfa tap, jafn leikur, þeim tekst að skora og okkur ekki. Við vorum kraftlausir í fyrri hálfleik og byrjuðum leikinn mjög illa. Við vorum að drífa okkur með boltann, vorum bara 'sloppy'. Það vantaði kraft í okkur, vorum langt frá mönnum og vorum ekki að ná að klukka þá í fyrri hálfleik. Við töpuðum návígunum okkar og vorum bara pínu ólíkir okkur í fyrri hálfleik. Við erum svo allt annað lið hérna í lokin, seinustu 30 fannst mér Vestra liðið vera eins og ég þekki af mínu liði. Fyrir mitt leiti er bara Viktor í markinu hjá Fram bara maður leiksins."
Varnarleikur Vestra hefur verið mjög góður á þessu tímabili þar sem þeir hafa aðeins fengið á sig þrjú mörk í fyrstu sjö leikjunum. Sóknarleikurinn hefur hinsvegar ekki verið jafn beittur, og það þarf mögulega aðeins að laga það.
„Við verðum að nýta færin okkar, eins og í dag fáum við fullt af færum. Við erum að skapa okkur þessi færi og þetta mun á endanum detta . Ég ætla ekki að fara leggja neina dóma á það núna, við erum alltaf hættulegir þegar við erum með boltann. Hvort sem að lið liggja til baka eða hvernig sem það er. Þannig ég hef engar áhyggjur af því, við þurfum bara að vera á okkar degi til þess að geta sýnt það sem við stöndum fyrir. Við vorum það bara ekki sérstaklega í fyrri hálfleik. En eins og ég segi, þeir fá víti og skapa sér lítið sem ekkert af færum, samt fannst mér við ekkert sérstakir varnarlega. Samt skapa þeir sér nánast ekki neitt og minna en við."
Viðtalið má sjá í heild sinni í spilaranum hér fyrir ofan.
