Stjarnan er komin í undanúrslit Mjólkurbikarsins annað árið í röð eftir að hafa unnið 4-2 sigur á Keflavík á Samsung-vellinum í Garðabæ í kvöld.

Stjörnumenn voru með öll völd á leiknum fyrsta stundarfjórðunginn og sköpuðu sér hvert dauðafærið á fætur öðru og ekkert sem benti til þess að Keflavík myndi sýna mótstöðu.

Það var því algerlega gegni gangi leiksins þegar Eiður Orri Ragnarsson kom Keflvíkingum í forystu á 15. mínútu. Kári Sigfússon fékk boltann á vinstri kantinum og kom boltanum inn á teiginn á Eið Orra, sem stakk sér fram fyrir Örvar og potaði boltanum í netið.

Keflvíkingar fundu aðeins taktinn eftir markið en þá kom jöfnunarmark frá heimamönnum. Benedikt Warén sótti aukaspyrnu rétt fyrir utan teig og þrumaði Emil Atlason spyrnunni í bláhornið. Óverjandi fyrir Sindra í markinu.

Mörkin héldu áfram að koma og voru það gestirnir sem komu sér aftur í forystu. Keflvíkingar fengu hornspyrnu sem fékk að skoppa inn í teignum og á Ásgeir Pál Magnússon sem stangaði boltann í netið af þriggja metra færi.

Jóhann Árni Gunnarsson jafnaði þremur mínútum síðar eftir frábæra pressu. Alex Þór Hauksson tók boltann af Stefáni Jóni Friðrikssyni og kom boltanum á Emil sem lagði hann fyrir Jóhann Árni og eftirleikurinn auðveldur.

Keflvíkingar voru ekki langt frá því að taka forystuna í þriðja sinn í leiknum er Kári átti viðstöðulaust skot af stuttu færi en Árni Snær Ólafsson var vandanum vaxinn í markinu og bjargaði í horn.

Stjörnumenn refsuðu fyrir það áður en hálfleikurinn var úti. Örvar Logi og Benedikt Warén áttu skemmtilegt samspil áður en Örvar kom boltanum inn á teiginn á Benedikt sem var mættur til að klára færið.

Stórskemmtilegur fyrri hálfleikur og tóku Stjörnumenn þráðinn þar sem frá var horfið í þeim síðari er Örvar Logi bætti við fjórða markinu þegar aðeins tæpar þrjár mínútur voru liðnar.

Slök hornspyrna fékk að skoppa út í teiginn og á Örvar sem hamraði boltanum í netið.

Heimamenn voru næstum því búnir að koma sér í þriggja marka forystu þegar rúmar tuttugu mínútur voru til leiksloka. Andri Rúnar Bjarnason og Guðmundur Baldvin Nökkvason spiluðu sín á milli á kantinum áður en Andri fékk boltann í teignum, náði að snúa sér, en skotið í varnarmann og beint á Sindra í markinu.

Haraldur Freyr Guðmundsson, þjálfari Keflavíkur, gerði þrefalda skiptingu stuttu síðar og komu varamennirnir öflugir inn í leikinn og hættan orðin meiri í sóknarleik liðsins.

Keflavík náði þó ekki að saxa á forystu Stjörnumanna sem eru komnir í undanúrslit bikarsins annað árið í röð, en Keflvíkingar úr leik.