England: Haaland hetjan gegn Arsenal og titilbaráttan galopin

Manchester City vann frábæran 2-1 sigur á Arsenal í stórleik tímabilsins á Etihad-leikvanginum í dag, en það var Erling Braut Haaland sem opnaði titilbaráttuna upp á gátt með sigurmarki tæpum hálftíma fyrir leikslok.

City-menn vissu það fyrir leikinn að sigur kæmi þeim í góða stöðu í titilbaráttunni.

Rayan Cherki opnaði leikinn á 16. mínútu leiksins er hann dansaði í gegnum vörn Arsenal og setti boltann neðst í vinstra hornið. Stórkostleg tilþrif hjá Frakkanum sem er að reynast ein bestu kaup tímabilsins, en hræðileg mistök Gianluigi Donnarumma jafnaði stöðuna á 18. mínútu.

Donnarumma tók á móti boltanum eftir innkast og tók auka snertingu. Kai Havertz fór í hápressu og náði að komast fyrir hreinsun ítalska markvarðarins og skaust boltinn þaðan efst í hægra hornið. Skelfilegt hjá Donnarumma og leikurinn orðinn jafn.

City var líklegra restina af fyrri hálfleiknum en skapaði sér samt ekki mörg opin færi. Antoine Semenyo átti ágætis tilraun og þá átti Haaland skot framhjá markinu.

Staðan í hálfleik 1-1 en í þeim síðari fór að færast meira fjör í leikinn.

Heimamenn komu sér í tvö ágætis færi. Fyrst átti Haaland skot framhjá markinu og síðan skaut Jeremy Doku boltanum beint á Raya.

Arsenal gat skorað tvö mörk með tveggja mínútna millibili en var óheppið að taka ekki forystuna. Fyrst var það Havertz sem fékk sendingu í gegn eftir frábæra sókn en Donnarumma sá við honum og þá náðu þeir ekki að nýta frákastið. Stuttu síðar átti Eberechi Eze skot sem hafnaði í stönginni og skoppaði út.

Á 65. mínútu leiksins tókst City að skora sigurmarkið. Donnarumma kastaði löngum bolta fram á Nico O'Reilly sem fann Doku vinstra megin áður en hann fékk aftur boltann, setti hann fyrir markið þar sem Rodri reyndi við skotið, en hitti ekki boltann. Haaland var hins vegar mættur eins og hrægammur, teygði sig í boltann og stýrði honum í vinstra hornið.

Risastórt mark í titilbaráttunni og hafði hann þarna betur við Gabriel eftir að hafa glímt við Brasilíumanninn allan leikinn.

Arsenal var nálægt jöfnunarmarki á 73. mínútu er aukaspyrna fór af O'Reilly og í stöngina áður en Havertz setti frákastið í Donnarumma.

Hiti færðist í leikinn á lokamínútunum. Haaland fékk sig fullsaddan af fantabrögðum Gabriel og fór haus í haus við varnarmanninn, sem að hálfpartinn skallaði Haaland, en í stað þess að gefa rautt gaf hann báðum gula spjaldið.

Á lokamínútunni fengu Arsenal-menn færi til þess að jafna leikinn er Leandro Trossard kom með boltann inn á teiginn en Havertz, sem var dauðafrír, skallaði boltann yfir markið.

Lærisveinar Pep Guardiola héldu þetta út á Etihad og unnu gríðarlega mikilvægan sigur í titilbaráttunni. Man City er áfram í öðru sæti, en nú með 67 stig, aðeins þremur á eftir Arsenal og á leik til góða.

Það stefnir því allt í svakalega titilbaráttu um Englandsmeistaratitilinn en auðvitað nóg af leikjum eftir og margt sem á eftir að gerast áður en tímabilið verður flautað af.