Hertha Berlin er búið að ganga frá samningsviðræðum við belgíska varnarmanninn Dedryck Boyata, sem kemur á frjálsri sölu frá Celtic. Hann skrifar undir samning til 2022.
Boyata er 28 ára gamall og var leikmaður Manchester City í sex ár áður en hann gekk í raðir Celtic sumarið 2015.
Hann lék 121 leik á fjórum árum hjá Celtic og skoraði 15 mörk. Hann á 15 A-landsleiki að baki fyrir Belgíu.
Boyata var ekki með fast sæti í liði Celtic á tímabilinu er liðið vann skosku deildina enn eina ferðina.
„Við höfum verið að fylgjast með Dedryck í góðan tíma og erum sannfærðir um gæði hans. Hann er mikill liðsstyrkur fyrir vörnina okkar," sagði Michael Preetz, yfirmaður íþróttamála hjá Hertha Berlin.
Athugasemdir
