Frank um Toney: Aldrei að vita hvað gerist

Toney var afar eftirsóttur eftir síðustu leiktíð en var svo dæmdur í leikbann vegna veðmála og sneri aftur á völlinn í janúar. Hann fann þó ekki gamla taktinn og skoraði aðeins 4 mörk í 16 leikjum.

Verðmiðinn á Toney var talinn vera nálægt 100 milljónum punda í fyrra en hann hefur lækkað umtalsvert síðan þá, þar sem Toney hefur ekki verið að skora jafn mikið og áður og á hann aðeins eitt ár eftir af samningi sínum við félagið.

„Það er aldrei að vita hvað gerist í sumar. Það er aldrei að vita hvað gerist í fótboltaheiminum. Við höfum til dæmis látið leikmenn frá okkur sem hafa svo snúið aftur til okkar skömmu síðar. Við getum ekki vitað hvernig þetta mun fara í sumar," sagði Frank þegar hann var spurður hvort hann væri með skilaboð fyrir stuðningsmenn Brentford sem ætluðu sér að kveðja Toney á síðasta heimaleik tímabilsins sem fer fram í dag.

„Það sem við getum öll verið sammála um er að Ivan er frábær leikmaður sem hefur verið gríðarlega mikilvægur fyrir okkur."