Túfa, Srdjan Tufegdzic þjálfari Vals, telur að sigur Vals gegn ÍBV í 8-liða úrslitum Mjólkurbikarsins í kvöld hafi verið sanngjarn. Hólmar Örn Eyjólfsson skoraði eina mark leiksins.
Lestu um leikinn: ÍBV 0 - 1 Valur
„Tilfinningin er mjög góð. Við unnum erfiðan leik gegn góðu liði ÍBV. Leikurinn var kaflaskiptur eins og oft vill vera í bikarleikjum en við náðum að klára þetta og ég er hrikalega ánægður," segir Túfa.
„Menn þurftu að fara aðeins úr þægindarammanum en mér fannst mínir menn gera þetta vel. Þeir sýndu andstæðingunum og vellinum virðingu. Það var hörkubarátta í liðinu allan tímann."
Túfa var tjáð að kollegi hans, Þorlákur Árnason þjálfari ÍBV, hafi ekki verið sáttur með dómgæsluna í leiknum. Túfa hrósaði hinsvegar Twana Khalid Ahmed dómara.
„Það er oft þannig að þjálfararnir sem tapa leikjum tala um dómgæsluna. Þetta var erfiður leikur að dæma en mér fannst Twana flottur. Hann er yfirleitt með góða stjórn á þeim leikjum sem hann hefur dæmt hjá okkur."
Það kemur í ljós í kvöld hverjir andstæðingar Vals í undanúrslitum verða en dregið verður í markaþætti RÚV.
Athugasemdir
